ಹನಿಗವನಗಳು-ಭಾಗ-2.

ಪ್ರೇ(ಹೋ)ಮ.

~~~~~~~~~~

ಲಜ್ಜೆಬಿಟ್ಟು ನೀ

ಹೆಜ್ಜೆಯಿಟ್ಟು ಸಜ್ಜಾಗಿ

ಬಂದ ಘಳಿಗೆಯಲ್ಲಿ

ಕುಡಿಯೊಡೆಯಿತು

ಪ್ರೇಮ...

ಅಂದಿನಿಂದಲೇ

ಶುರುವಾಯಿತು

ಎದೆಯಲ್ಲಿ

ವಿರಹದಾ

ಹೋಮ.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

ಬೇಡಿಕೆ.

~~~~~~

ನಿಲ್ಲದು ಬಾಳ

ಪಯಣ

ಒಪ್ಪದು ಒಮ್ಮೆ

ಮರಣ

ಆಗುತಿಹುದು ವ್ಯರ್ಥ

ಕಾಲಹರಣ

ಗೆಳತಿ

ಬೇಗ ಶುರುಮಾಡು

ನಿನ್ನ ಪ್ರೇಮದ ಪಾರಾಯಣ!.

ಶೈ(ಮೈ)ಲಿ.

~~~~~~~

ನನ್ನ ಕವನಗಳಲ್ಲಿ

ನನ್ನದು

ವಿಶೇಷ ಶೈಲಿ

ಅದಕೆ ಜನ ಕೇಳಲು

ಆಗದೆ ಓಡ್ತಾರೆ

ನೂರಾರು ಮೈಲಿ.!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

ನಲ್ಲೆಗೆ ಸ್ವಾಗತ.

~~~~~~~~~~

ಅಲ್ಲಿ ಇಲ್ಲಿ ಓಡುವ

ನನ್ನ ಚಂಚಲ

ಮನಸನು ನೀ

ನಿನ್ನಲ್ಲೇ

ಏಕಾಗ್ರವಾಗುವಂತೆ

ಮಾಡಿದೆಯಲ್ಲೇ…

ಹಾಂ! ಆಗಲೇ

ನಾನೂ, ನೀನೇ

ನನ್ನ ನಲ್ಲೆಯೆಂಬುದನು

ಒಪ್ಪಿಕೊಂಡೆನಲ್ಲೇ!

ಹಾರೈಕೆ.

~~~~~~

ಚಲಿಸದ ಕಾಲದ

ನದಿಯಲ್ಲಿ

ನಿನ್ನ-ನನ್ನ

ಪ್ರೇಮದ ದೋಣಿ

ಎಡೆಬಿಡದೆ ಸಾಗಲಿ

ಪ್ರೀತಿಗೆ ಅಂತ್ಯವಿಲ್ಲ

ಎಂಬುದನು

ಮತ್ತೊಮ್ಮೆ ಅದು

ಈ ಜಗಕೆ ಸಾರಲಿ.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

ಆಕಸ್ಮಿಕ.

~~~~~~

ರೆಪ್ಪೆ ಮುಚ್ಚಿ

ಕಣ್ಣಲ್ಲೆ ನೆನೆದೆ

ನೀ ಬಂದು

ಕಣ್ಣ ಮುಂದೆ ನಿಂತಂತೆ

ಕಣ್ಣ ತೆರೆದು

ನೋಡಲು

ನೀನೇ ನಿಂತಿದ್ದೆ

ಎದುರಲ್ಲಿ

ನನಸೇ ಎದ್ದುಬಂದಂತೆ!

ಪ್ರತಿಕ್ರಿಯೆ.

~~~~~~~

ನಮ್ಮೆರಡು ಆತ್ಮಗಳ

ನಡುವಿನ ಈ

ಅಮರ ಮಧುರ ಸಂಗಮ

ಕಂಡು

ನಸು ನಾಚಿ ನಕ್ಕು

ಸುಮ್ಮನೆ ಮರೆಯಾದ

ಆ ಬಾನ ಚಂದ್ರಮ!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

ಮೌನದಲ್ಲಿ…

~~~~~~~~~

ಮೌನದಲ್ಲಿ

ಮಾತು ಮಾತನಾಡದು

ಮನಸು ತನ್ನೊಳು

ತಾನು ಮಾತಾಡುವುದು.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

ಪ್ರತಿಬಿಂಬ.

~~~~~~~~

ಸಲಿಲದಲ್ಲೂ ನಿನ್ನದೇ

ಪ್ರತಿಬಿಂಬ

ಲೀಲಾಜಾಲವಾಗಿ ಹರಡಿತ್ತು

ಮುಟ್ಟಲೆಂದು ಬಂದೆ

ಪಟ್ಟು ಜಂಭ

ನಿನ್ನ ಮುಖ ಚಿತ್ರ ಆಗ

ಅಲೆ ಅಲೆಯಾಗಿ ಹರಡಿತ್ತು!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

ವಾಸ್ತವ-1.

~~~~~~~~

ಪಲ್ಲವಿಯೇ ಇರದೆ

ಚರಣವಿರಬಹುದು

ಚರಣಗಳೇ ಇರದೆ

ಪಲ್ಲವಿಯೊಂದೇ

ಹಾಡಾಗಬಹುದು

ಜಗದ ಚಿಂತೆಯಲ್ಲಿ

ಪ್ರೀತಿ ಇರದೇ

ಹೋದರೆ ಎಲ್ಲವೂ

ಶೂನ್ಯವೇ ಆಗುವುದು!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

ವಾಸ್ತವ-2.

~~~~~~~~

ಅರ್ಧ ಬದುಕು

ಸದ್ದಿಲ್ಲದಂತೆಯೇ

ಸರಿಯುತ್ತದೆ

ಇನ್ನರ್ಧವನ್ನು

ನಾವೇ

ಸರಿಸಬೇಕಾಗುತ್ತದೆ.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

ವಾಸ್ತವ-೩.

~~~~~~~~

ನಿನ್ನೆಯಂತೆ ಇಂದು

ನಾನಿರುವುದಿಲ್ಲ-

ಅದ್ಯಾವ ನಂಬಿಕೆಯ

ಮೇಲೆ ಒಪ್ಪಿ ಆಕೆ

ಸತಿಯಾದಳೋ?!

ನನಗಿಂದೂ ಅರ್ಥವೇ

ಆಗಿಲ್ಲ.!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

ಭಾವನೆ ಇಲ್ಲದ ಮೇಲೆ...

~~~~~~~~~~~~~~~

ಪದ ಪುಂಜವಿದ್ದರೇನು,

ಸುಲಲಿತ ಭಾಷೆಯಾದರೇನು

ವಾಕ್ಯ ವ್ಯಾಕರಣವಿದ್ದರೇನು

ಭಾವನೆಗಳೇ ಇಲ್ಲದ ಮೇಲೆ

ಶುದ್ಧ ಕವನವಾದೀತು ಹೇಗೆ?

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

ಬಳಕೆ.

~~~~~

ಬದಿಗಿಟ್ಟು ಮನಸಿನ

ನೂರಾರು ಯೋಚನೆ

ಕಟ್ಟಿಸಿದೆ ನಾನೊಂದು

ಮನೆಯನ್ನ!

ಬದಿಗಿಟ್ಟ ಯೋಚನೆಗಳನ್ನೇ

ಮರಳಿ ಪಡೆದು

ಕವಿಯಾಗಿ ಕಟ್ಟಿದೆ

ನಾನೊಂದು ಕವನ.!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

ಸ್ವಾಧೀನ.

~~~~~~~

ಸದ್ದಿಲ್ಲದಂತೆ ಜಗವು

ಚಲಿಸುತ್ತಿರುವುದರ

ಗಮನ ನನಗಿದೆ

ಏಕೆಂದರೆ ನನ್ನ

ಮನ ಇನ್ನೂ

ನನ್ನಲ್ಲೇ ಇದೆ ಗೆಳತಿ!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

ಪ್ರೀ(ಭೀ)ತಿ.

~~~~~~~

ಉಸಿರುಗಟ್ಟಿದಂತಿದ್ದ

ಬದುಕಿನಲ್ಲಿ

ಚಿಗುರೊಡೆಯುವಂತೆ

ಮಾಡಿತ್ತು

ಅವಳ ಪ್ರೀತಿ!

ಯಾರ ವಕ್ರ ದೃಷ್ಠಿ

ಬಿತ್ತೋ ನಮ್ಮ ಮೇಲೆ!

ಚಿವುಟಿ ಹಾಕಿ

ಇಂದು ಕೊಲ್ಲುತ್ತಿದೆ

ನಿತ್ಯವೂ ಮನೆಮಾಡಿ

ಮನದಲ್ಲಿ ಭೀತಿ.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

ಹೊಸರೂಪ.

~~~~~~~~~
ಕನಸೆಂಬ ಕನ್ನಡಿಯ

ಪ್ರತಿಬಿಂಬ ನನಸಾದಾಗ

ಚಿತ್ರವಾಗಿತ್ತು!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

ರೀ-ಯಾಕ್ಟೀವ್!‌

~~~~~~~~~~
ಅವಳ ಪ್ರೇಮದಲ್ಲಿ

ಇದ್ದಾಗ

ಅವನು ವೆರಿ

ರಿಯಾಕ್ಟೀವ್!‌

ಪ್ರೇಮ ವೈಫಲ್ಯಕ್ಕೆ

ತಿರುಗಿದಾಗ

worry ಆಗಿ ಅಗಿ

ಆಗಬೇಕಿದೆ ಈಗ

Re-ಯಾಕ್ಟೀವ್!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

Re-ಫ್ರೆಶ್.‌

~~~~~~~

ತಾಕಲಾಟಗಳ

ಮಧ್ಯೆ ಕೊರಗುತ್ತ

ಮಲಗಿರಲು

ಅವಳ ತನು

ತಾಕಿದಾಟದಲಿ

ಕ್ಷಣಕಾಲ

ಹಾಯೆನಿಸಿತು!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

ಅನಿವಾರ್ಯ.

~~~~~~~~~~

ನಿನ್ನ ಹಿಂದೆಯೇ

ಸಾಗಲು

ಏನೋ ಸಂತಸ

ಅದು ಪ್ರೀತಿಯೇನಲ್ಲ

ಮಳೆ ಬಂದಾಗ

ಇದು ಅನಿವಾರ್ಯ

ಓಡಲಾಗದಲ್ಲ!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~ವಿಶ್ವಾಸ.

~~~~~~

ಹೇಳಬಲ್ಲೆ ನಾ

ನಿಸ್ಸಂದೇಹವಾಗಿ,

ನಿನ್ನ ಮೇಲಿನ

ವಿರಹವೇ ಕಾರಣ

ನಿನ್ನ ಹೆಚ್ಚು

ಪ್ರೀತಿಸುವ

ದಾರಿಯಲ್ಲಿ ನಾ

ಸದಾ ಇರಲು.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~ನಿ(ನೀ)ವೇದನೆ.

~~~~~~~~~~

ಪ್ರಿಯೇ,

ನಿನ್ನಲ್ಲಿ ನನ್ನ

ನಿವೇದನೆ...

ಈ ಪ್ರೀತಿಯಲಿ

ಎಷ್ಟೇ ಕಷ್ಟ ಇರಲಿ

ಪಡದಿರು ನೀ ವೇದನೆ.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~ದ್ವಂದ್ವ.

~~~~~~

ದುಃಖದ ಭರದಲ್ಲಿ ಅಂದಿದ್ದೆ

“ಯಾರಿಗೆ ಬೇಕು ಈ ಲೋಕ?!”

ಸುಖದಲ್ಲಿರಲು ಅನಿಸಿತು

“ಎಲ್ಲವ ಬಿಟ್ಟು ಒಂದು ದಿನ-

ಹೋಗಲೇಬೇಕಾ?!”

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

ಸನಿಹ.

~~~~~

ಓರೆಕೋರೆಯ

ರೇಖೆಗಳಿಂದ

ರಚಿಸಿದ್ದು ಚಿತ್ರ

ಪ್ರೀತಿ-ಪ್ರೇಮಗಳಿಂದ

ಬದಲಾದೀತು

ಜಗದ ವಿಚಿತ್ರ!

ನೀ ದೂರವಿದ್ದರೂ

ನಿನ್ನ ಮಾತುಗಳಲ್ಲಿ

ಎಂದಿಗೂ ನಾ ಹತ್ರ!!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

 ಕ(ವ)ದನ.

~~~~~~~

ಹೇಗೆ ಹೇಳಲಿ

ಗೆಳತಿ

ನನ್ನ ಮನದ

ಕದನ

ಎದುರಲ್ಲಿ ನೀ

ಬಂದು

ತೋರಲು ನಿನ್ನ

ಸುಂದರ ವದನ!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

ಆತ್ಮವಿಶ್ವಾಸ.

~~~~~~~~~

ಬದುಕು ನನ್ನದು

ಇನ್ನೂ ಮುಗಿದಿಲ್ಲ!

ಅದ್ಹೇಗೆ ಕಂಡೀತು

ಕೊನೆಯ?

ನೀ ಇನ್ನೂ ನನಗೆ

ನನ್ನ ಪ್ರೀತಿಸುವೆ

ಎಂದು ಹೇಳೇ

ಇಲ್ಲವಲ್ಲ!!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

ಅಂತರಾಳ.

~~~~~~~~

ಅವಳು ಪ್ರೀತಿಸಿ

ಮರೆತು ಹೋಗಲಿಲ್ಲ

ಮರೆಯದಂಥ

ನೆನಪುಗಳನುಳಿಸಿ

ಹೋಗಿಬಿಟ್ಟಳು!

ಅದಕೆ ನನಗೆ ಮತ್ತೊಬ್ಬ

ಅವಳಂಥವಳು

ಸಿಕ್ಕಲೇ ಇಲ್ಲ!!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

ಬತ್ತಿ ಅಜ್ಜಿ.

~~~~~~~~

ಆಕೆಗೆ ಈ ಹೆಸರು

ಬಂದದ್ದು

ಜೀವನದಲ್ಲಿ ದುಗುಡ

ಅನುಭವಿಸಿ

ಬತ್ತಿ ಹೋದ ಕಾರಣಕ್ಕಾಗಿ

ಅಲ್ಲ

ಪೂಜೆಗೆ ಬತ್ತಿ ಮಾಡುತ್ತಾ

ಕುಳಿತಾಗ

ಅವರಿವರ ಬಗ್ಗೆ

ಬತ್ತಿ ಇಡೋ ಕೆಲ್ಸ

ಮಾಡಿದ ಪ್ರಸಿದ್ಧಿಗಾಗಿ!

ಸವಿ-ಜೇನು.

~~~~~~~~

ನಿನ್ನ ಪ್ರತಿ ಮಾತು

ಹೊಳೆಯೋ

ಸ್ವಾತಿ ಮುತ್ತು

ನಿನ್ನ ಎಲ್ಲ ಮಾತು

ನನಗೆ

ಜೇನಿನ ತುತ್ತು.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

ಹುಚ್ಚು.

~~~~~~

ಇದ್ದರೆ ತಪ್ಪಲ್ಲ

ಹೆಚ್ಚು ಕವನ

ಓದುವ ಹುಚ್ಚು!

ಇರದಿರಲಿಯಷ್ಟೇ,

ಹುಚ್ಚು ಹುಚ್ಚು

ಕವನ ಗೀಚುವ

ಹುಚ್ಚು!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~ನಿನಗೆ ನಾ...

~~~~~~~~

ನೀ ರೆಕ್ಕೆಯಾದರೆ

ನಾ ಗಾಳಿಯಾಗುವೆ

ನೀ ನಕ್ಕೆಯೆಂದರೆ

ನಾ ಮಗುವಾಗುವೆ

ಸಂಗಾತಿ ನಿನ್ನ

ಸಾನಿಧ್ಯ ಸಿಕ್ಕರೆ

ಹಗಲಲ್ಲೂ ಇರುಳಲ್ಲೂ

ಅನುಕ್ಷಣವೂ

ನಾ ನಿನ್ನ

ಕಾವಲುಗಾರನಾಗುವೆ!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

ಇಂಗಿತ.

~~~~~~

ನಾನು ಒಂಟಿಯಾಗಿ

ಇರೆನು ಎಂದು

ಅವಳಿಗೆ ಗೊತ್ತು

ಅದಕೆ

ಜಂಟಿಯಾಗಲು ನನ್ನ

ಗಂಟು ಬಿದ್ದಳು!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

 ವಾದ.

~~~~~

ನನ್ನದು ಒಂದೇ ವಾದ

ನಮ್ಮ ಪ್ರೇಮ

ವಿವಾದಕ್ಕೆ

ಈಡಾಗುವುದು ಬೇಡ!
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

ವೈರಾಗ್ಯ.

~~~~~~~

ಬೇಕಿತ್ತು ನನಗೆ

ದಿನವೂ ಗಳಿಕೆ

ಈಗ ಇನ್ನೇಕೆ?

ಮರೆಸಿತು

ನನ್ನಲಿ ನಿನ್ನ

ಅಗಲಿಕೆ!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~ನೀತಿಯ ಪಾಠ.

~~~~~~~~~~

ಎನಗೆ ಬೇಕಿಲ್ಲ

ನಿನ್ನ ಪ್ರೀತಿಯ

ಪರಿಪಾಠ

ಮನದಲ್ಲಿ ಹಾಸುಹೊಕ್ಕು

ನಾ ನಿನ್ನ ಮಡಿಲಲ್ಲಿ

ತಲೆಯಿಟ್ಟು

ಮಲಗಿದಾಗ!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

ನಟನೆ.

~~~~~~

ಸಾಯುವುದಂತೂ

ಸತ್ಯ ನಡಿ ಗೆಳತಿ

ನಾವಿಬ್ಬರೂ ಇಂದೇ

“ಸಾಯೋ ಆಟ-

ಆಡೋಣ!”

ಆಗಲಾದರೂ ನಮ್ಮ

ಅಪ್ಪ-ಅಮ್ಮ

ಮದುವೆಗೆ

ಒಪ್ಪಿಗೆ ಕೊಟ್ಟಾರು!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~ಅಲ್ಲೇ-ಇಲ್ಲೇ.

~~~~~~~~~

ನಲ್ಲೆ ನೀ ಇದ್ದರೂ

ನಿನ್ನ ತವರಲ್ಲೇ

ಮನಸ್ಸು ಮಾತ್ರ

ಮಿಡಿಯುವುದು ಇಲ್ಲೇ!

ನಲ್ಲೆ ನೀ ಇದ್ದರೂ

ಅಲ್ಲೇ!ಕನಸಲ್ಲಿ

ಮಾತ್ರ

ಇದ್ದಂತೆ ಇಲ್ಲೇ!.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~ಕಾರಣ.

~~~~~~

ಎರಡು ಮಕ್ಕಳ ತಂದೆ

ಮನೆಯಲ್ಲಿ ನೊಂದೆ

ಕಾರ್ಯಕ್ರಮಕ್ಕೆ ತಡವಾಗಿ ಬಂದೆ

ದಯವಿಟ್ಟು ಕ್ಷಮಿಸಿ ಎಂದೆ.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~ಬಂಧನ.

~~~~~~~

ನನಗೂ ನಿನಗೂ

ಬಿಡಿಸಲಾಗದ ಬಂಧನ

ಅದಕೆ ಸದಾ

ಬಂಧಿಸಿದೆ ನಿನ್ನನು

ನನ್ನಲಿ ಈ

ಬಾಹು ಬಂಧನ.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

ಸಂ-ದೇಹ.

~~~~~~~

ಪ್ರೇಮದಲ್ಲಿ

ಸಂದೇಹ

ಬರುವ ಮೊದಲೇ

ಬೆರೆತಿದ್ದವು

ಅವರ ಹಸಿದ

ದೇಹ!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

ಕಳೆದು ಹೋದ

ನೆನಪುಗಳ

ಗುಂಗಲ್ಲೇ-

ಉಳಿದ

ಜೀವನ ಕಳೆಯಬಾರದು

ಮರೆತುಹೋದ

ಪುಟಗಳನು

ಮತ್ತೆ ಮತ್ತೆ ತೆರೆದು

ನೋಡಬಾರದು

ಅರಿಯದೇ ಆಗಿಹೋದುದಕೆ

ಸಮಯದ ಸರಪಳಿಯಲ್ಲಿ

ಸಿಕ್ಕು ನರಳಬಾರದು

ಸಿಕ್ಕ ಪ್ರೀತಿಯನು

ಒಪ್ಪಿ ಬಿಗಿದಪ್ಪಿ

ಬದುಕದೇ ಇರಬಾರದು.

ಮರೆತು ಹೋದ

ಪುಟಗಳನು

ಮತ್ತೆ ತೆರೆಯಬಾರದು

ಬದುಕಿನಲಿ ಮತ್ತೆ

ಪ್ರೇಮದ ಚಿಗುರನು

ಮೊಳಗಿಸಿದವರನು

ಎಂದಿಗೂ

ಮರೆಯಬಾರದು.

ನಿನ್ನಲ್ಲಿನ

ಅಂತಃಕರಣಕೆ

ಪ್ರೀತಿಯೇ ಕಾರಣ

ನಿನ್ನಲ್ಲಿನ

ಆಕರ್ಷಣೆಗೆ

ಮೋಹವೇ ಕಾರಣ

ನಿನ್ನ ಆಂತರ್ಯದ

ಅವಿರ್ಭಾವಕೆ

ನನ್ನೊಳಗೆ

ನಿನ್ನ ಅರಿಯುವ

ಹಂಬಲವೇ ಕಾರಣ!...

ಬದುಕಿನಲ್ಲಿ

ಏಳು ಬೀಳುಗಳು ಸಹಜ

ಹೇಳು ನೀ ಅವಕ್ಕೆ

ಇತಿಶ್ರೀ...

ನನ್ನೀ ಬದುಕಿನಲಿ

ಹೊಸದಾಗಿ ಬಂದು

ಕೊನೆವರೆಗೂ

ಜೊತೆಯಾಗಿ ಉಳಿಯಲೆಂದು

ಬಂದ ಓ ನನ್ನ

ಕಾವ್ಯಶ್ರೀ...

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

ಅನುಕ್ಷಣದ

ಅನುದಿನದ

ಅನವರತ

ಅನುರಣಿತ

ಮೋಹಕ್ಕೆ

ಸಿಲುಕಿಯಾಯ್ತು

ಮೊದಲಬಾರಿ

ನಿನ್ನ ಕಂಡ ಆ

ಮೊದಲ ಕ್ಷಣದಲ್ಲಿ...

ಎಲ್ಲೋ ಹುಟ್ಟಿ

ಎಲ್ಲೋ ಬೆಳೆದು

ಎಲ್ಲೋ ಮರೆಯಾಗುವ

ಎಲ್ಲೆ ಇಲ್ಲದ

ಬದುಕಲಿ ಏಕೆ ನೀ

ಕೊರಗುವೆ?

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

ಸೇ(ಶೇ)ವ್.‌

~~~~~~~

ನಾನೇನೂ

ಹೆಚ್ಚಿನವನಲ್ಲ!

ನ

ನ್ನು

ತೆಗೆದು

ಮಾಡುವವ.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

ಊರೆಲ್ಲಾ ಸುತ್ತಿ

ಜನಾನೆಲ್ಲ ನೋಡಿ

ಇನ್ನೂ ಬದುಕುಳಿದ

ಬದುಕೆಂಬ ಬದುಕಲ್ಲಿ

ನೀನು ನೀನಾಗಿ

ಬಾಳದಿದ್ದೊಡೆ

ಬದುಕಾದರೂ ನಿನಗೇಕೆ

ನೀನು ನೀನಾಗಿರು!

ಮುನ್ನುಡಿಯನ್ನೇ ಬಯಸದ ಕತೆ...

ಇನ್ನು ಮುಂದೆ ಬರೀ ನುಡಿದದ್ದೇ!

ಮತ್ತೇಕೆ ನುಡಿ...ಮುನ್ನುಡಿ!

ಮುಂದಾಗಲು ಜೊತೆಗಿದೆ ಕನ್ನಡ ನುಡಿ!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

ಅವನಿಚ್ಛೆಗೆ ಬರೆದೆ

ಅವಳಿಚ್ಛೆಗೆ ಬರೆದೆ

ಅವರಿಚ್ಛೆಗೆ ಬರೆದೆ

ನಾ ಸುಮ್ಮನೆ ಬರಿದೇ ಬರೆದೆ

ನನ್ನಿಚ್ಛೆಗೆ ಬರೆಯ ಹೊರಟರೆ

ಪದಗಳು ನನ್ನಲ್ಲಿ ಉಳಿದಿರಲಿಲ್ಲ!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

ದೂರು.

~~~~~~

ದೂರ ಸರಿದವಳು

ದೂರುವಳು ಮತ್ತೆ

ದೂರಾದ ಮೇಲೂ

ದೂರುವುದು ಸರಿಯೇ?

ದೂರಲೆಂದೇ ದೂರಾದಳೇ!

ದೂರ ತಳ್ಳಿದವಳ ದುರುಗುಟ್ಟಿ

ದೂರಲೆಂದುಕೊಳ್ಳಲು

ದೂರದಲ್ಲಿರುವ ಅವಳನೆಂತು

ದೂರಲಿ!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

ಮತ್ತೆ ಮತ್ತೆ ಹುಡುಕಾಡಿದಷ್ಟೂ

ಮತ್ತೆ ಮತ್ತೆ ಸಿಗುತ್ತಾ ಹೋಗುತ್ತದೆ

ಸಿಕ್ಕಿದ್ದು ಉಳಿಯುತ್ತದೆಯೋ ಗೊತ್ತಿಲ್ಲ

ಎಂದೋ ಒಂದಿನಾ ಖಂಡಿತ ಅಳಿಯುತ್ತದೆ

ಈ ಜಗತ್ತೆಂಬ ಗತ್ತಿನಲ್ಲಿ ಶಾಶ್ವತವಾಗಿ

ನೆಲೆನಿಲ್ಲುವುದೆಂಬುದೂ ಯಾವುದೂ ಇಲ್ಲ...

ಏನು ಮಾಡೋಕಾಗುತ್ತೆ!!

ಅಶಾಶ್ವತೆಗೆ ನಾವು ಶಾಶ್ವತ ಪ್ರಯತ್ನ ಮಾಡ್ತೇವೆ!

ಎಂದೋ ಒಂದು ದಿನ ಎಲ್ಲವೂ ಅಶಾಶ್ವತವೆಂದು

ತಿಳಿದಾಗ ಇಷ್ಟು ದಿನದ ಬದುಕಿನ ಬಗ್ಗೆ

ನಾವೇ ಹಳಿಯುತ್ತೇವೆ.  ನಮ್ಮನ್ನೇ ಹೀಯಾಳಿಸಿಕೊಳ್ತೇವೆ...

ಏಕೆಂದರೆ ಯಾವುದಕ್ಕೂ ನಿಖರತೆಯಿಲ್ಲ

ʼಖರೆʼ ಇರೋ ʼನಿಖರತೆʼಯನ್ನು ನಾವು ಹುಡುಕುವುದಿಲ್ಲ

ಹುಡುಕಲೂ ಕೆಲವೊಮ್ಮೆ(ಬಹುಪಾಲು ಎಲ್ಲಾ ಸಮಯದಲ್ಲೂ)

ಆಗಲಿಕ್ಕಿಲ್ಲ!.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

ಅವಳನು

ಕಂಡಾಗ

ನನಗೋ

ಏನೋ

ಸಮಾಧಾನ!

ಇದರಿಂದ

ನಮ್ಮ

ಮನಸುಗಳಿಗೆ

ನಾವೇ

ಮಾಡಿಕೊಂಡಂತೆ

ಸನ್ಮಾನ!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

ಮತ್ತದೇ ಹುಡುಗಿ ನೆನಪು

ಮತ್ತದೇ ಕೆಲಸದ ಅಲೆದಾಟ

ಮತ್ತದೇ ನಾಳೆಗೆ ಬೇಕಾದ ಹಣಕ್ಕಾಗಿ

ದುಂಬಾಲು

ಮತ್ತದೇ ದ್ವೇಷ-ಆಸೆ-ವೈರುಧ್ಯದ

ತಾಕಲಾಟ

ಮತ್ತದೇ ಸಂತಸದ ಹುಡುಕಾಟ

ಅಹುದು ಈ ಜೀವಕೋಟಿಗೆ

ಅಂಟಿಕೊಂಡಿರುವ

“ಮತ್ತದೇ!”...(ಮತ್ತು-ಅದೇ)

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

“ನೆಮ್ಮದಿಯ ನಾಳೆಗಳು ಬರಬಹುದೇ?!”

ನಾಳೆಯ ನಿರೀಕ್ಷೆ ನಿನ್ನಲ್ಲಿರಲು

ಪ್ರಶ್ನೆ ಮೂಡಬಹುದೇನೋ!!

ಇಂದು ನೀ ದುಃಖಿಯಾದಾಗ ಹಾಗನ್ನಿಸಿರಬಹುದೇನೋ!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

ಒಲವೆಂದರೆ...

~~~~~~~~~

ಒಲವೆಂದರೆ-

ಬರೀ ಭಾವನೆಗಳ ಸಮುಚ್ಛಯವಲ್ಲ

ಮೌನ ಮುರಿದು ಮಾತಿಗಿಳಿದ ಕ್ಷಣವಲ್ಲ

ನಾಳೆಗಳ ರಂಗುರಂಗಿನ ಕನಸಲ್ಲ

ಕೊಟ್ಟು-ಪಡೆವ ವಿನಿಮಯವಲ್ಲ

ಸುಖದ ಸುರಿಮಳೆಯಲ್ಲ

ದುಃಖದ ಜಡಿಮಳೆಯಲ್ಲ

ಬಾಂಧವ್ಯ ಮುರಿವ-ಬೆಸೆವ ಸರಪಳಿಯಲ್ಲ

ನಲ್ಲೆಯ ಕೈಗಿತ್ತು ಸರಿವ ಪುಷ್ಪಗುಚ್ಛವಲ್ಲ

ಮರೆಯನು ಎಂದುಸುರಿದ ವಾಗ್ದಾನವಲ್ಲ

ಗತಿಸಿದ್ದನ್ನೇ ವಿವರಿಸುವ ಇತಿಹಾಸವಲ್ಲ

ಬದುಕಿಗೆ ಬರೆಯುವ ಮುನ್ನುಡಿಯಲ್ಲ

ಸಾವಿನೊಂದಿಗೆ ಮುಗಿಸುವ ಬೆನ್ನುಡಿಯಲ್ಲ

ಬೆಂಗಾವಲಿರದ ಒಂಟಿ ಬದುಕಿಗೆ ಮಾರ್ದನಿಯಷ್ಟೇ ಅಲ್ಲ

ಹರಿದು ಹಂಚಿಹೋದ ಮನೋಃಶಕ್ತಿಗೆ ಸಾಂತ್ವನವಲ್ಲ.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~