ಹನಿಗವನಗಳು...

ಪ್ರೇ(ಹೋ)ಮ.

~~~~~~~~~~

ಲಜ್ಜೆ ಬಿಟ್ಟು ನೀ

ಹೆಜ್ಜೆ ಇಟ್ಟು ಸಜ್ಜಾಗಿ

ಬಂದ ಘಳಿಗೆಯಲ್ಲಿ

ಕುಡಿಯೊಡೆಯಿತು

ಪ್ರೇಮ...

ಅಂದಿನಿಂದಲೇ

ಶುರುವಾಯ್ತು

ಎದೆಯಲ್ಲಿ

ವಿರಹದಾ

ಹೋಮ!

ಬೇಡಿಕೆ.

~~~~~~

ನಿಲ್ಲದು ಬಾಳ

ಪಯಣ

ಒಪ್ಪದು ಒಮ್ಮೆ

ಮರಣ

ಆಗುತಿಹುದು ವ್ಯರ್ಥ

ಕಾಲಹರಣ

ಗೆಳತಿ

ಬೇಗ ಶುರು ಮಾಡು

ನಿನ್ನ ಪ್ರೇಮದ ಪಾರಾಯಣ!

ಶೈ(ಮೈ)ಲಿ.

~~~~~~~

ನನ್ನ ಕವನಗಳಲ್ಲಿ

ನನ್ನದು

ವಿಶೇಷ ಶೈಲಿ

ಅದಕೆ ಜನ ಕೇಳಲು

ಆಗದೆ

ಓಡ್ತಾರೆ ನೂರು ಮೈಲಿ!

ನಲ್ಲೆಗೆ ಸ್ವಾಗತ.

~~~~~~~~~~

ಅಲ್ಲಿ ಇಲ್ಲಿ ಓಡುವ

ನನ್ನ ಚಂಚಲ

ಮನಸನು ನೀ

ನಿನ್ನಲ್ಲೇ

ಏಕಾಗ್ರವಾಗುವಂತೆ

ಮಾಡಿದೆಯಲ್ಲೇ...

ಹಾಂ! ಆಗಲೇ

ನಾನೂ,ನೀನೇ

ನನ್ನ ನಲ್ಲೆಯೆಂಬುದನು

ಒಪ್ಪಿಕೊಂಡೆನಲ್ಲೇ!

ಹಾರೈಕೆ.

~~~~~~

ಚಲಿಸದ ಕಾಲದ

ನದಿಯಲ್ಲಿ

ನಿನ್ನ-ನನ್ನ

ಪ್ರೇಮದ ದೋಣಿ

ಎಡೆಬಿಡದೆ

ಸಾಗಲಿ

ಪ್ರೀತಿಗೆ ಅಂತ್ಯವಿಲ್ಲ

ಎಂಬುದನು

ಮತ್ತೊಮ್ಮೆ ಅದು

ಈ ಜಗಕೆ

ಸಾರಲಿ.

ಆಕಸ್ಮಿಕ.

~~~~~~

ರೆಪ್ಪೆ ಮುಚ್ಚಿ

ಕಣ್ಣಲ್ಲೆ ನೆನೆದೆ

ನೀ ಬಂದು

ಕಣ್ಣ ಮುಂದೆ ನಿಂತಂತೆ

ಕಣ್ಣ ತೆರೆದು ನೋಡಲು

ನೀನೇ ನಿಂತಿದ್ದೆ

ಎದುರಲ್ಲಿ

ನನಸೇ ಎದ್ದು ಬಂದಂತೆ!

ಪ್ರತಿಕ್ರಿಯೆ.

~~~~~~~~

ನಮ್ಮೆರಡು ಆತ್ಮಗಳ

ನಡುವಿನ ಈ

ಅಮರ ಮಧುರ ಸಂಗಮ

ಕಂಡು

ನಸು ನಾಚಿ ನಕ್ಕು

ಸುಮ್ಮನೆ ಮರೆಯಾದ

ಆ ಬಾನ ಚಂದ್ರಮ.

ಮೌನದಲ್ಲಿ...

~~~~~~~~~~

ಮೌನದಲ್ಲಿ ಮಾತು

ಮಾತನಾಡದು

ಮನಸು ತನ್ನೊಳು

ತಾ ಮಾತಾಡುವುದು.

ಪ್ರತಿಬಿಂಬ.

~~~~~~~~

ಸಲಿಲದಲ್ಲೂ ನಿನ್ನದೇ

ಪ್ರತಿಬಿಂಬ

ಲೀಲಾಜಾಲವಾಗಿ ಹರಡಿತ್ತು

ಮುಟ್ಟಲೆಂದು ಬಂದೆ

ಪಟ್ಟು ಜಂಭ

ನಿನ್ನ ಮುಖ ಚಿತ್ರ ಆಗ

ಅಲೆ ಅಲೆಯಾಗಿ ಹರಡಿತ್ತು!

ವಾಸ್ತವ-1.

~~~~~~~~

ಪಲ್ಲವಿಯೇ ಇರದೆ

ಚರಣವಿರಬಹುದು

ಚರಣಗಳೇ ಇರದೆ

ಪಲ್ಲವಿಯೊಂದೇ

ಹಾಡಾಗಬಹುದು

ಜಗದ ಚಿಂತೆಯಲ್ಲಿ

ಪ್ರೀತಿ ಇರದೇ

ಹೋದರೆ ಎಲ್ಲವೂ

ಶೂನ್ಯವೇ ಆಗುವುದು!

ವಾಸ್ತವ-2.

~~~~~~~~

ಅರ್ಧ ಬದುಕು

ಸದ್ದಿಲ್ಲದಂತೆಯೇ

ಸರಿಯುತ್ತದೆ

ಇನ್ನರ್ಧವನ್ನು

ನಾವೇ

ಸರಿಸಬೇಕಾಗುತ್ತದೆ!

ವಾಸ್ತವ-3.

~~~~~~~~

ನಿನ್ನೆಯಂತೆ ಇಂದು

ನಾನಿರುವುದಿಲ್ಲ-

ಅದ್ಯಾವ ನಂಬಿಕೆಯ

ಮೇಲೆ ಒಪ್ಪಿ ಆಕೆ

ಸತಿಯಾದಳೋ?!

ನನಗಿಂದೂ ಅರ್ಥವೇ

ಆಗಿಲ್ಲ!

ಸ್ವಾಧೀನ.

~~~~~~~

ಸದ್ದಿಲ್ಲದಂತೆ ಜಗವು

ಚಲಿಸುತ್ತಿರುವುದರ

ಗಮನ ನನಗಿದೆ

ಯಾಕೆಂದರೆ ನನ್ನ

ಮನ ಇನ್ನೂ

ನನ್ನಲ್ಲೇ ಇದೆ ಗೆಳತಿ!

ಪ್ರೀ(ಭೀ)ತಿ.

~~~~~~~~

ಉಸಿರುಗಟ್ಟಿದಂತಿದ್ದ

ಬದುಕಿನಲ್ಲಿ

ಚಿಗುರೊಡೆಯುವಂತೆ

ಮಾಡಿತ್ತು ಅವಳ ಪ್ರೀತಿ!

ಯಾರ ವಕ್ರ ದೃಷ್ಟಿ

ಬಿತ್ತೋ ನಮ್ಮ ಮೇಲೆ!

ಚಿವುಟಿ ಹಾಕಿ ಕೊಲ್ಲುತ್ತಿದೆ

ನಿತ್ಯವೂ ಮನೆ ಮಾಡಿ

ಮನದಲ್ಲಿ ಭೀತಿ.

ರೀ-ಯಾಕ್ಟೀವ್!‌

~~~~~~~~~~

ಅವಳ ಪ್ರೇಮದಲ್ಲಿ

ಇದ್ದಾಗ

ಅವನು ವೆರಿ

ರಿಯ್ಯಾಕ್ಟೀವ್

ಪ್ರೇಮ ವೈಫಲ್ಯಕ್ಕೆ

ತಿರುಗಿದಾಗ

ವರಿ ಆಗಿ ಅಗಿ

ಆಗಬೇಕಿದೆ ಈಗ

ರೀ-ಯಾಕ್ಟೀವ್!‌

ರೀ ಫ್ರೆಶ್!‌

~~~~~~~

ತಾಕಲಾಟಗಳ

ಮಧ್ಯೆ ಕೊರಗುತ್ತ

ಮಲಗಿರಲು

ಅವಳು ತನು

ತಾಕಿದಾಟದಲಿ

ಕ್ಷಣಕಾಲ ಹಾಯೆನಿಸಿತು!

ಅನಿವಾರ್ಯ.

~~~~~~~~~

ನಿನ್ನ ಹಿಂದೆಯೇ

ಸಾಗಲು

ಏನೋ ಸಂತಸ

ಅದು ಪ್ರೀತಿಯೇನಲ್ಲ

ಮಳೆ ಬಂದಾಗ

ಇದು ಅನಿವಾರ್ಯ

ಓಡಲಾಗದಲ್ಲ!

ವಿಶ್ವಾಸ.

~~~~~~

ಹೇಳಬಲ್ಲೆ ನಾ

ನಿಸ್ಸಂದೇಹವಾಗಿ,

ನಿನ್ನ ಮೇಲಿನ

ವಿರಹವೇ ಕಾರಣ

ನಿನ್ನ ಹೆಚ್ಚು

ಪ್ರೀತಿಸುವ

ದಾರಿಯಲ್ಲಿ ನಾ

ಸದಾ ಇರಲು.

ನಿ(ನೀ)ವೇದನೆ.

~~~~~~~~~~

ಪ್ರಿಯೇ,

ನಿನ್ನಲ್ಲಿ ನನ್ನ

ನಿವೇದನೆ...

ಈ ಪ್ರೀತಿಯಲಿ

ಎಷ್ಟೇ ಕಷ್ಟ ಇರಲಿ

ಪಡದಿರು

ನೀ ವೇದನೆ.

ದ್ವಂದ್ವ.

~~~~~~

ದುಃಖದ ಭರದಲ್ಲಿ ಅಂದಿದ್ದೆ

“ಯಾರಿಗೆ ಬೇಕು ಈ ಲೋಕ?!”

ಸುಖದಲ್ಲಿರಲು ಅನಿಸಿತು

“ಎಲ್ಲವ ಬಿಟ್ಟುಒಂದು ದಿನ-

ಹೋಗಲೇಬೇಕಾ?!”

ಹೊಸ ರೂಪ.

~~~~~~~~~~

ಕನಸೆಂಬ ಕನ್ನಡಿಯ

ಪ್ರತಿಬಿಂಬ ನನಸಾದಾಗ

ಚಿತ್ರವಾಗಿತ್ತು!

ಸನಿಹ.

~~~~~

ಓರೆಕೋರೆಯ

ರೇಖೆಗಳಿಂದ

ರಚಿಸಿದ್ದು ಚಿತ್ರ

ಪ್ರೀತಿ-ಪ್ರೇಮಗಳಿಂದ

ಬದಲಾದೀತು

ಜಗದ ವಿಚಿತ್ರ!

ನೀ ದೂರವಿದ್ದರೂ

ನಿನ್ನ ಮಾತುಗಳಲ್ಲಿ

ಎಂದಿಗೂ ನಾ ಹತ್ರ!

ಕ(ವ)ದನ.

~~~~~~~

ಹೇಗೆ ಹೇಳಲಿ

ಗೆಳತಿ

ನನ್ನ ಮನದ

ಕದನ

ಎದುರಲ್ಲಿ ನೀ

ಬಂದು

ತೋರಲು ನಿನ್ನ

ಸುಂದರ ವದನ!

ಆತ್ಮ ವಿಶ್ವಾಸ.

~~~~~~~~~~~

ಬದುಕು ನನ್ನದು

ಇನ್ನೂ ಮುಗಿದಿಲ್ಲ!

ಅದ್ಹೇಗೆ ಕಂಡೀತು

ಕೊನೆಯ?

ನೀ ಇನ್ನೂ ನನಗೆ

ನನ್ನ ಪ್ರೀತಿಸುವೆ

ಎಂದು ಹೇಳೇ

ಇಲ್ಲವಲ್ಲ!

ಅಂತರಾಳ.

~~~~~~~~~

ಅವಳು ಪ್ರೀತಿಸಿ

ಮರೆತು ಹೋಗಲಿಲ್ಲ

ಮರೆಯದಂಥ

ನೆನಪುಗಳನುಳಿಸಿ

ಹೋಗಿ ಬಿಟ್ಟಳು!

ಅದಕೆ ನನಗೆ ಮತ್ತೊಬ್ಬ

ಅವಳಂಥವಳು

ಸಿಕ್ಕಲೇ ಇಲ್ಲ!

ಬತ್ತಿ ಅಜ್ಜಿ.

~~~~~~~~

ಆಕೆಗೆ ಈ ಹೆಸರು

ಬಂದದ್ದು

ಜೀವನದಲ್ಲಿ ದುಗುಡ

ಅನುಭವಿಸಿ

ಬತ್ತಿ ಹೋದ ಕಾರಣಕ್ಕಾಗಿ

ಅಲ್ಲ

ಪೂಜೆಗೆ ಬತ್ತಿ ಮಾಡುತ್ತಾ

ಕುಳಿತಾಗ

ಅವರಿವರ ಮುಂದೆ

ಅವರಿವರ ಬಗ್ಗೆ

ಬತ್ತಿ ಇಡೋ ಕೆಲ್ಸ

ಮಾಡಿದ ಪ್ರಸಿದ್ದಿಗಾಗಿ!

ಸವಿ-ಜೇನು.

~~~~~~~~

ನಿನ್ನ ಪ್ರತಿ ಮಾತು

ಹೊಳೆಯೋ

ಸ್ವಾತಿ ಮುತ್ತು

ನಿನ್ನ ಎಲ್ಲ ಮಾತು

ನನಗೆ

ಜೇನಿನ ತುತ್ತು.

ಹುಚ್ಚು.

~~~~~~~

ಇದ್ದರೆ ತಪ್ಪಲ್ಲ

ಹೆಚ್ಚು ಕವನ

ಬರೆಯೋ ಹುಚ್ಚು!

ಇರದಿರಲಿಯಷ್ಟೇ,

ಹುಚ್ಚು ಹುಚ್ಚು ಕವನ

ಗೀಚುವ ಹುಚ್ಚು!

ನಿನಗೆ ನಾ...

~~~~~~~~

ನೀ ರೆಕ್ಕೆಯಾದರೆ

ನಾ ಗಾಳಿಯಾಗುವೆ

ನೀ ನಕ್ಕೆಯೆಂದರೆ

ನಾ ಮಗುವಾಗುವೆ

ಸಂಗಾತಿ ನಿನ್ನ

ಸಾನಿಧ್ಯ ಸಿಕ್ಕರೆ

ಹಗಲಲ್ಲೂ ಇರುಳಲ್ಲೂ

ಅನುಕ್ಷಣವೂ

ನಾ ನಿನ್ನ

ಕಾವಲುಗಾರನಾಗಿರುವೆ!

ಇಂಗಿತ.

~~~~~~

ನಾನು ಒಂಟಿಯಾಗಿ

ಇರೆನು ಎಂದು

ಅವಳಿಗೆ ಗೊತ್ತು

ಅದಕೆ

ಜಂಟಿಯಾಗಲು ನನ್ನ

ಗಂಟು ಬಿದ್ದಳು!

ವಾದ.

~~~~~

ನನ್ನದು ಒಂದೇ ವಾದ

ನಮ್ಮ ಪ್ರೇಮ

ವಿವಾದಕ್ಕೆ

ಈಡಾಗುವುದು ಬೇಡ!

ವೈರಾಗ್ಯ.

~~~~~~~

ಬೇಕಿತ್ತು ನನಗೆ

ದಿನವೂ ಗಳಿಕೆ

ಈಗ ಇನ್ನೇಕೆ?

ಎಲ್ಲವ ಮರೆಸಿತು

ನನ್ನಲಿ ನಿನ್ನ

ಅಗಲಿಕೆ!

ನೀತಿಯ ಪಾಠ.

~~~~~~~~~~

ಎನಗೆ ಬೇಕಿಲ್ಲ

ನಿನ್ನ ಪ್ರೀತಿಯ

ಪರಿಪಾಠ

ಮನದಲ್ಲಿ ಹಾಸುಹೊಕ್ಕು

ನಾ ನಿನ್ನ ಮಡಿಲಲ್ಲಿ

ತಲೆಯಿಟ್ಟು

ಮಲಗಿದಾಗ!

ನಟನೆ.

~~~~~

ಸಾಯುವುದಂತೂ

ಸತ್ಯ -ನಡಿ ಗೆಳತಿ

ನಾವಿಬ್ಬರೂ ಇಂದೇ

ʼಸಾಯೋ ಆಟ-

ಆಡೋಣ!”

ಆಗಲಾದರೂ ನಮ್ಮ

ಅಪ್ಪ ಅಮ್ಮ

ಮದುವೆಗೆ

ಒಪ್ಪಿಗೆ ಕೊಟ್ಟಾರು!

ಅಲ್ಲೇ-ಇಲ್ಲೇ!

~~~~~~~~~

ನಲ್ಲೆ ನೀ ಇದ್ದರೂ

ನಿನ್ನ ತವರಲ್ಲೇ

ಮನಸ್ಸು ಮಾತ್ರ

ಮಿಡಿಯುವುದು ಇಲ್ಲೇ!

ನಲ್ಲೆ ನೀ ಇದ್ದರೂ

ಅಲ್ಲೇ! ಕನಸಲ್ಲಿ

ಮಾತ್ರ

ಇದ್ದಂತೆ ಇಲ್ಲೇ!

ನೆಪ.

~~~~~

ಎರಡು ಮಕ್ಕಳ ತಂದೆ

ಮನೆಯಲ್ಲಿ ನೊಂದೆ

ಕಾರ್ಯಕ್ರಮಕ್ಕೆ ತಡವಾಗಿ ಬಂದೆ

ದಯವಿಟ್ಟು ಕ್ಷಮಿಸಿ ಎಂದೆ.